Tragic Death : जिल्ह्यातील पातूर जवळ शिक्षक मतदारसंघाचे आमदार किरण सरनाईक यांच्या भावाच्या गाडीला भीषण अपघात झाला. दोन चारचाकी वाहनांची समोरासमोर धडक झाली. अपघातातील मृतांमध्ये सरनाईक कुटुंबातील तिघांसह एकूण सहा जणांचा मृत्यू आणि तिघे जखमी झाल्याची माहिती आहे.
प्राप्त माहितीनुसार वाशीम जिल्ह्यातील सरनाईक कुटुंब वाशिमकडून अकोल्याकडे येत होते.दरम्यान विरुद्ध दिशेने येणाऱ्या पातूर तालुक्यातील आस्टूल येथील रहिवासी ठाकरे यांच्या वाहनाची त्यांच्या वाहनाशी धडक झाली. यामध्ये रघुवीर अरुणराव सरनाईक वाशिम, शिवानी अजिंक्य आमले नागपूर, अस्मिता अजिंक्य आमले नागपूर व आस्टूल रहिवासी अमोल शंकर ठाकरे, सुमेध इंगळे, सिद्धार्थ यशवंत इंगळे हे सहा जण या अपघातात ठार झाल्याची प्राथमिक माहिती आहे.
जखमीं मध्ये पियुष देशमुख, सपना देशमुख,श्रेयस सिद्धार्थ इंगळे यांचा समावेश आहे. त्यांच्यावर अकोला येथे उपचार चालू आहे. त्यांची प्रकृती गंभीर असल्याची माहिती आहे. अपघात होताच घटनास्थळी पातूरच्या नागरिकांनी घटनास्थळी पोहचून जखमींना अकोला येथील रुग्णालयात पाठवले. घटनास्थळी पातूर पोलिसांनी पोहचून घटनेचा पंचनामा केला. अपघाताची भीषणता पाहता सर्वत्र हळहळ व्यक्त करण्यात येत आहे.
