Yavatmal District : पंजाबकडून नांदेडला जात असताना इनोव्हा कारने ट्रकला जोरदार धडक दिली. या अपघातात 4 भाविकांचा जागीच मृत्यू झाल्याची दुर्दैवी घटना यवतमाळ जिल्ह्यातील कळंब येथे घडली. यात एक जण गंभीर जखमी झाला आहे. त्याच्यावर यवतमाळ शासकीय वैद्यकीय महाविद्यालय रुग्णालयात उपचार सुरु आहेत. त्याचीही प्रकृती चिंताजनक असल्याचे समजते.
पंजाबमधून नांदेड येथे काही भाविक गुरुद्वारा दर्शनाकरिता इनोव्हा या गाडीने निघाले होते. नागपूर – तुळजापूर या महामार्गावर कळंबजवळ या कारने ट्रकला जोरदार धडक दिली. 1 जुलै सकाळी 6.45 वाजताची ही घटना असल्याचे सांगितले जाते. अपघात इतका भीषण होता की इनोव्हा गाडी ही अक्षरश ट्रकच्या मागच्या भागात घुसली आणि फसली. सुरक्षेच्या दृष्टीने असलेल्या एअर बॅग्सच्यासुद्धा चिंधड्या झाल्या.
कळंब पोलिस स्थानकाच्या निरीक्षक दीपमाला भेंडे यांनी तात्काळ घटनास्थळी धाव घेतली. या घटनेत 2 पुरुष आणि 2 महिलांचा जागीच मृत्यू झाला. मदतीसाठी गावकरी पुढे सरसावले. इनोव्हा कारमधील एका जणांची प्रकृती चिंताजनक आहे. त्याच्यावर यवतमाळ शासकीय रुग्णालयात उपचार सुरू असल्याची माहिती आहे.
ग्रामस्थांची मदत
घटनेची माहिती मिळताच आमचे सहकारी घटनास्थळी पोहोचले आणि तत्काळ मदतकार्य सुरु केले. हे भाविक पंजाबमधून आले होते. ट्रक आणि इनोव्हा कार या एकाच दिशेने यवतमाळकडे चालल्या होत्या. दोन्हीही गाड्या एका दिशेने जात होत्या. इनोव्हा कारने ट्रकला मागून धडक दिली. रात्रभर प्रवास केल्याने ड्रायव्हरला झोपेची डुलकी आली असण्याची दाट शक्यता आहे. मी पुढील तपास करीत आहे. मी स्वतः घटनास्थळी भेट द्यायला निघालो आहे, असे पोलिस अधीक्षक डॉ. पवन बनसोड यांनी सांगितले.
