DRI Action : महसूल गुप्तचर संचालनालयच्या (डीआरआय) मुंबई युनिटने शनिवारी नागपुरात मेफेड्रोन (एमडी) तयार करण्यासाठी कथित अंमलीपदार्थ तस्करी सिंडिकेट आणि त्यांच्या बेकायदेशीर तात्पुरत्या प्रयोगशाळेचा पर्दाफाश केला. एजन्सीने अवैध बाजारात 78 कोटी रुपये किमतीचे 51.95 किलो प्रक्रिया केलेले द्रव मेफेड्रोन जप्त केले. यात सिंडिकेटचा मास्टरमाइंड, फायनान्सर आणि त्याच्या तीन साथीदारांना एनडीपीएस कायद्यांतर्गत अटक केली.
नागपुरातील पाचपावली भागात बांधकाम सुरू असलेल्या एका इमारतीत मेफेड्रोनचे उत्पादनात होत असल्याची माहिती मिळाल्यावर एजन्सीकडून कारवाई करण्यात आली. त्यानंतर शनिवारी त्या ठिकाणी शोध मोहिम हाती घेण्यात आली. शोधात असे दिसून आले की, एमडी तयार करण्यासाठी आवश्यक असलेली सर्व आवश्यक रसायने, साहित्य आणि यंत्रसामग्रीचा पुरेसा साठा असलेली एक छोटी प्रयोगशाळा स्थापन करण्यात आली आहे. कथित सूत्रधाराने निषिद्ध उत्पादनासाठी गुप्त युनिट, यंत्रसामग्रीचा संपूर्ण संच खरेदी केला. त्यानंतर ही लॅब स्थापित केली. यात 100 किलोपेक्षा जास्त मेफेड्रोन तयार करण्याची क्षमता असलेला कच्चा माल मिळवला सापडला आहे.
मोठ्या प्रमाणावर तस्करी
शोधाच्या वेळी डीआरआयला आढळले की, ड्रग्स सिंडिकेटने कथितपणे 50 किलोपेक्षा जास्त मेफेड्रोन द्रव स्वरूपात आधीच तयार केले होते. क्रिस्टलाइज्ड, पावडर स्वरूपात सायकोट्रॉपिक पदार्थ तयार करण्यासाठी त्यावर पुढील प्रक्रिया सुरू होती. डीआरआय एजन्सीने कच्चा माल आणि उपकरणांसह 51.95 किलो मेफेड्रोन द्रव स्वरूपात जप्त केला ज्याची किंमत सुमारे 78 कोटी रुपये आहे. कच्च्या संसाधनांची खरेदी आणि प्रक्रिया केलेल्या प्रतिबंधित वस्तूंच्या विक्रीमध्ये गुंतलेल्यांसह त्यांच्या साथीदारांचा पर्दाफाश करण्यात आला. त्यानंतर अटक केलेल्या आरोपींना न्यायालयाने पुढील चौकशीसाठी डीआरआयच्या कोठडीत पाठवले होते.
कारवाईत डीआरआयला नागपूर पोलिसांचेही सहकार्य लाभले. अधिकाऱ्यांनी सांगितले की, अमली पदार्थांच्या तस्करी नेटवर्कचा पर्दाफाश करण्यासाठी ऑपरेशन्स हाती घेण्यात आले होते. ही मोहिम यशस्वी झाली. ऑक्टोबर 2023 मध्ये एका कारवाईत, एजन्सीने छत्रपती संभाजी नगर (औरंगाबाद) येथे 160 कोटी रुपये किमतीचे लिक्विड मेफेड्रोन जप्त केले होते. डीआरआयने एका औषध कंपनीच्या दोन कारखान्यांच्या परिसरात घेतलेल्या झडतीमुळे सुमारे 107 लिटर द्रव मेफेड्रोन जप्त करण्यात आले. त्यानंतर डीआरआयने कारखान्याचा मालक आणि गोदाम व्यवस्थापकासह दोन जणांना एनडीपीएस कायद्याच्या तरतुदींखाली अटक केली.
नागपुरात झालेल्या या कारवाईमुळे आता मोठी खळबळ उडाली आहे. एमडी तयार होत आल्याची माहिती स्थानिक नागपूर पोलिसांना नव्हती का, असा प्रश्न उपस्थित होत आहे. नागपुरात ड्रग्स तस्कर पकडण्यात आल्यानंतर आता या मुद्द्यावर राजकारण तापण्याची शक्यता आहे.
