Sanjay Gaikwad : आपल्या वेगवेगळ्या आणि बिनधास्त वक्तव्यांमुळे संजय गायकवाड नेहमी चर्चेत राहतात. बुलढाण्यातील एकनाथ शिंदे गटाचे आमदार संजय गायकवाड यांच्या विविध विधानाचे ऑडिओ, व्हिडीओ क्लिप नेमहीच व्हायरल होतात. यावरून अनेकवेळा गायकवाड हे अडचणीतही आलेले आहेत. मात्र सध्या त्यांचा एक व्हिडीओ माध्यमांवर चांगलाच व्हायरल झाला आहे. हा व्हिडीओ आहे गायकवाड यांच्या झिंगाट डान्सचा.
बुलढाण्याचे शिवसेना आमदार संजय गायकवाड यांच्या मुलाचा विवाह 29 मे रोजी होत आहे. या समारंभाला मुख्यमंत्री एकनाथ शिंदे यांच्यासह विविध मंत्री आणि आमदार उपस्थित राहणार आहेत. बुलढाण्यात मोठ्या धुमधडाक्यात हा विवाह सोहळा पार पडत आहे. या सोहळ्यातील संगीत समारोह 27 मे रोजी सायंकाळी पार पडला.
गायकवाडही थिरकले
एरवी आपल्या वादग्रस्त वक्तव्याने परिचित असलेले आमदार संजय गायकवाड यांनी संगीत समारोहामध्ये कुटुंबासह झिंगाट गाण्यावर ताल धरला. यावेळी आमदार गायकवाड यांना गाणे गाण्याचा मोहही आवरला नाही. त्यामुळे नागरिकांना त्यांच्यातील गायक देखील अनुभवता आला. तसे पाहिले तर आमदार संजय गायकवाड आणि डान्स हे जुने समीकरण आहे. बुलढाणाकरांना हे माहित आहे. कुठल्याही मिरवणुकीत आमदार गायकवाड आपल्या कार्यकर्त्यांच्या आग्रहाखातर विविध गाण्यांवर ठेका धरतात. मिरवणुकीतील नागरिकांचा उत्साह देखील वाढवतात. स्वतःच्या मुलाच्या लग्नात गेल्या दोन दिवसांपासून विविध कार्यक्रमांमध्ये ते डीजेच्या तालावर बेधुंदपणे थिरकताना दिसत आहेत. एवढेच नव्हे तर त्यांनी आपल्या पत्नीसोबत ‘मै शायर तो नही’, ‘पल पल दिल के पास तुम रहती हो’, अशी विविध गाणी गायली.
