EVM Issue : पंतप्रधान नरेंद्र मोदी यांनी शुक्रवारी नवनिर्वाचित संसद सदस्यांना संबोधित केले. विरोधी इंडिया अलायन्सवर त्यांनी जोरदार टीका केली. त्यांनी इलेक्ट्रॉनिक व्होटिंग मशिन (EVM) मध्ये हेराफेरी केल्याच्या विरोधकांच्या आरोपांची यावेळी री ओढली. ईव्हीएममध्ये घोळ असल्याचे हवेतील आरोप करणारे विरोधक असल्याचे ते म्हणाले.
ईव्हीएमची अंत्ययात्रा काढणाऱ्या विरोधकांनी ईव्हीएम मेलेले आहे की जीवंत आहे, याचे उत्तर द्यावे. निवडणुकीतील नुकसानीसाठी ईव्हीएमला जबाबदार धरले गेले. भारत निवडणूक आयोगाला कमजोर करण्याचा प्रयत्न विरोधकांनी केल्याचा आरोप मोदींनी केला. “4 जूनपूर्वी, विरोधक अथकपणे ईव्हीएमवर दोषारोप करत होते. भारताच्या लोकशाही प्रक्रियेवरील जनतेचा विश्वास कमी करण्याचा निर्धार केला होता. मला वाटले की ते ईव्हीएमची अंत्ययात्रा काढतील. परंतु निवडणुकीच्या निकालांनी हे आरोप प्रभावीपणे शांत झाले,” असे मोदी म्हणाले.
काँग्रेसवर बोचरी टीका
2014 पासून लागोपाठ तीन सार्वत्रिक निवडणूक झाल्या. 100 जागांचा टप्पा ओलांडण्यात असमर्थता दर्शवत मोदींनी आपल्या भाषणात काँग्रेस पक्षावरही निशाणा साधला. “दहा वर्षांनंतरही काँग्रेस 100 जागांचा आकडा गाठू शकली नाही. विरोधी आघाडीचा वेगाने घसरण होण्याचा अंदाज त्यांनी व्यक्त केला.
ये तो सिर्फ ट्रेलर
राष्ट्रीय लोकशाही आघाडीवर (एनडीए) देशाचा विश्वास अधोरेखित झाला आहे. पंतप्रधान मोदी म्हणाले, “देशाचा अतूट विश्वास आणि आत्मविश्वास स्वाभाविकपणे अपेक्षा वाढवतो. ज्याला मी फायदेशीर मानतो.” मोदींनी गेल्या दशकातील उपलब्धींवर आधारित प्रगतीचा वेग वाढवण्याच्या त्यांच्या वचनबद्धतेचा पुनरुच्चार केला. त्यांनी याचा फक्त “ट्रेलर” म्हणून उल्लेख केला.
विजयातही राहिलो नम्र
मोदींनी विजयात नम्रतेचे महत्त्व सांगितले. “4 जूननंतरचे आमचे वागणे, आमची ओळख दर्शवते. उन्माद न करता किंवा पराभूतांची खिल्ली न उडवता विजय कसा पचवायचा हे आम्हाला माहित आहे. आम्ही विकृत न होता विजयाचे रक्षण करतो.” मोदींनी असे प्रतिपादन केले की, एनडीए सरकार हे भारताच्या इतिहासातील सर्वात मजबूत युती आहे. सर्वसमावेशकता आणि सामूहिक प्रयत्नांवर जोर देणारे आहे.”
एनडीए हा देशासाठी बांधील असलेला गट आहे. त्याची सुरुवात 30 वर्षांपूर्वी युती म्हणून झाली होती. आज ती भारताच्या राजकीय व्यवस्थेतील एक सेंद्रिय युती म्हणून उभी आहे. याचे पालनपोषण अटलबिहारी वाजपेयी, प्रकाशसिंग बादल आणि बाळासाहेब ठाकरे यांनी केले. याशिवाय अनेक महान नेत्यांनी केले आहे. गेल्या दशकभरात आम्ही त्यांचा वारसा आणि मूल्ये पुढे नेली आहेत,” असे पंतप्रधान मोदी म्हणाले.
मोदींनी एनडीएला भारतीय राजकीय इतिहासातील सर्वात यशस्वी आघाडी घोषित केले. सर्वसहमती आणि सर्व समावेशकतेसाठी प्रयत्नशील राहण्याची शपथ घेतली. “मी देशातील जनतेला आश्वासन देतो की आम्ही सर्वसहमतीसाठी प्रयत्न करू. देशाला पुढे नेण्यात कोणतीही कसर सोडणार नाही. एनडीएचा तीन दशकांचा प्रवास हा काही सामान्य पराक्रम नाही”. एनडीए हा सुशासनाचा समानार्थी आहे, असेही पंतप्रधान नरेंद्र मोदी म्हणाले.
