Mahavikas Aghadi : लोकसभा निवडणुकीत महायुतीला अपेक्षित जागा मिळाल्या नाहीत. तर महाविकास आघाडीला चांगलं यश मिळालं. मात्र वंचित बहुजन आघाडी आणि एमआयएम मुळे महाविकास आघाडीला सहा ठिकाणी फटका बसल्याचा दावा काँग्रेस कडून करण्यात आला आहे.
काँग्रेस नेत्या आणि पक्षाच्या प्रवक्त्या सुप्रिया श्रीनेट यांचा विश्वास आहे की, लोकसभा निवडणुकीत काँग्रेस आणि महाविकास आघाडी अधिक जागा जिंकू शकले असते. ॲड. प्रकाश आंबेडकर यांचा पक्ष वंचित बहुजन आघाडी आणि असदुद्दीन ओवेसी यांचा पक्ष एआयएमआयएम यांच्यामुळे महाविकास आघाडीला सहा जागांचा फटका बसला आहे. या दोन्ही पक्षांनी आपापले उमेदवार उतरवून महाविकास आघाडीची मताधिक्य स्वतःकडे वळवली, असा आरोप त्यांनी केला आहे. त्यामुळे आगामी काळात यावर राजकारण रंगण्याची शक्यता आहे.
लोकसभा निवडणुक जरी संपली असली तरी अद्यापही आकड्यांची बेरीज करीत विविध दावे प्रतिदावे सर्वच पक्षांकडून करण्यात येत आहेत. एकमेकांवर आरोपही केले जात आहेत. आता काँग्रेसकडून महाविकास आघाडीला राज्यात कसा फटका बसला याच गणित सांगितलं जातं आहे.
काँग्रेसने सहा जागांचे पूर्ण गणित उलगडले!
सुप्रिया श्रीनेत म्हणाल्या की, अकोल्यात ‘भारत’ आघाडीला 416404 मते मिळाली तर एनडीएला 457030 आणि वंचितला ला 276747 मते मिळाली. ही जागा महाविकास आघाडीने 40626 मतांनी गमावली. तर संभाजीनगरच्या जागेवर ‘इंडिया’ आघाडीला 293450 मते मिळाली, एनडीए ला 476130 तर ओवेसींच्या पक्ष एमआयएम ला 341480 मते मिळाली. महाविकास आघाडीने 182680 मतांनी ही देखील गमावली. जर आपण बुलढाण्याबद्दल बोललो तर येथे ‘इंडिया’ आघाडीला 320388 मते आणि एनडीएला 349867 मते मिळाली, तर वंचितला 98441 मते मिळाली. महाविकास आघाडीनेही ही जागा 29479 मतांनी गमावली असल्याचं त्यांनी म्हटलं आहे.
Bhandara Politics : नानांचा गड भेदण्यासाठी महायुतीची व्यूहरचना
हातकणंगले, मुंबई उत्तर पश्चिम आणि पालघरच्या जागांवरही असेच गणित आहे. ‘महाविकास’ आघाडीने हातकणंगलेची जागा 13426 मतांनी गमावली. या जागेवर वंचितला 32696 मते मिळाली. सर्वात रोचक लढत मुंबई उत्तर पश्चिम जागेवर पाहायला मिळाली. ‘इंडिया’ आघाडीला मुंबई उत्तर पश्चिम जागेवर केवळ 48 मतांनी पराभव स्वीकारावा लागला. येथून वंचितला 10052 मते मिळाली. पालघरच्या जागेवर ‘इंडिया’ आघाडीचा 183306 मतांनी पराभव झाला. येथून वंचितला 254517 मते मिळाली. त्यामुळे या दोन पक्षामुळं महाविकास आघाडीचा सहा जागी पराभव झाल्याचा दावा त्यांनी केला आहे. आता या दाव्यावर नेमक्या काय प्रतिक्रिया येतात हे पाहावे लागणार आहे.
